Tuesday, January 23, 2018

పరిష్కారం

సమస్యను గుర్తిస్తే మరో సమస్య

సమస్యని సమస్యగా గుర్తించక పోవడం కూడా
ఒక సమస్యే...

ఒక్కోసారి తెలీనట్టు ఊరుకోవడమే
పరిష్కారం అనుకుంటా!!!


Monday, January 15, 2018

నువ్వే, నీతోనే



నీ గురించి చెప్పాలనుకున్నా
నువ్వే ఉంటావు

నా గురించి చెప్పాలనుకున్నా
నువ్వే ఉంటావు

ఇంకా 
నేనేం మాట్లాడను?

నాకు పదాలు అంటే మన మాటలే
సమయం అంటే మనం కలిసున్నదే
జీవితం అంటే నీతో గడిపిందే
మిగతాదంతా ఊరికే... వట్టి అబద్ధం !

ఎప్పుడు చూసినా,
నాలా లేనంటూ, ఇదివరకటిలా లేనంటూ
అందరూ చెప్పే మాటలు
నవ్వు తెప్పిస్తున్నాయి

ఎలా చెప్పాలో తెలీడం లేదు
నా నుంచి ఎదురు చూడడానికి వాళ్లకి ... ఏమీ మిగల లేదని!

నువ్వేనా విప్లవం
నువ్వేనా విడుదల
నువ్వేనా సత్యం
నువ్వేనా ఆఖరి మజిలీ

వాళ్లకి ఎలా చెప్పాలో తెలీడం లేదు
నేను అనే వాడిని నాకైనా లేనని

నీతోనే సంగతి
నీతోనే సంతోషం
నీతోనే పంతం
నీతోనే విరమణ
నీతోనే ప్రయత్నం
నీతోనే నిష్క్రమణ

నువ్వే,
నీతోనే