Friday, October 3, 2014

అర్ధం కాని ఈ ప్రశ్న

ఏమైందో నిన్న.. 
అదే జరుగుతోందీ ఈరోజు 

ఇలాగే జరిగితే ... ఇదే జరుగుతుంటే
ఏదో ఓ రోజు వెనక్కి తిరిగి చూసుకుంటే 
జీవించింది ఒకే ఒక్క రోజు అనిపిస్తుందేమో!

ఒక్క కాగితం ఉంటె దాన్ని చిత్తూ ప్రతి అనో కర పత్రమనో అంటారు 
కాని గ్రన్ధమనరుగా ... 

కలిసే మనుషులు వాళ్ళే 
చేసే పనులు అవే 
తిరిగే ఆలోచనలు 
పాదం పరిచయం చేసుకున్న ప్రదేశాలు 
చూసే ప్రసారాలు అవె.. 

అదే తిట్టుకోవడం
అదే సర్దుబాటు 
అదే అద్దెకు తెచ్చుకున్న నవ్వులు 
అదే అతికించుకున్న మొఖాలూ  
అదే మూస 
అదే కాలక్షేపం 

ఏముందని కొత్తగా 
ఏముందని మార్పు?

అడిగితే మాత్రం ... 
వందల.. వేల . లక్షల కోట్ల .. గొంతులు లేస్తాయి ... 
చర్చలు.. సమా'వేషా'లు.. హడావిడి హద్దులు దాటతాయి 
సంఘం పేరునో 
సమాజం పేరునో 
సంస్కృతి పేరునో 
సంస్కరణ పేరునో 
వర్గం పేరునో 
వర్ణం పేరునో 
ఎవరి వివ'రణ' లు వారు లెవదీస్తారు.. 
ఉన్న సమస్యలకు ఉత్తుత్తి పార్శ్వాలను అద్దుతారు .... 

కానీ... !
కానీ... !
కానీ... !
పడవేం అడుగులు సమాధానం వైపు.. 
అర్ధం కాని ఈ ప్రశ్నకు .. అసలు అర్ధం ఉందా?
ఏమో?