Saturday, July 6, 2013

నేను మాత్రం మారిపోయాను , ఎలాగ జరిగిందీ ఇది?


పనికి రాని సూత్రాలు
గిరి గీసుకున్న గురుతులు
ఏది నేను రెండింటిలో?

పేర్చుకున్న నమ్మకాలు
నమ్ముకున్న బంధాలు
ఏది నేను రెండింటిలో?

ఏరుకొచ్చిన ఆలోచనలు
పోగుచేసుకున్న పోలికలు
ఏది నేను రెండింటిలో?

చదువు
సంపాదన
అనుభవం
ఆకారం పోసుకున్న మాంసపు ముద్ద
ఏది నేను ఇన్నింటిలో?

కోపం
భయం
ఆవేశం
ఆర్తి
ఆనందం
ఆశ
అసహ్యం
ఏది నేను వీటన్నింటిలో?

ఎప్పటి నించీ..
నేను దాచుకున్నవి
నాతో పోల్చుకోవడం మొదలు పెట్టాను ?

ఎలాగ
నావైనవి
నేనవడం తెలుసుకోలేక పోయాను?

ఎప్పటిలా వర్షపు చినుకులు అమాయకంగా
నన్ను పలకరిస్తున్నాయి..

నేలపై అప్పుడే పుట్టిన చిన్న మొలక
నన్ను చూసి నవ్వుతోంది

క్రమం తప్పకుండా సూర్యుడు రోజూ
నా దగ్గర హాజరు వేయించుకుంటాడు

ప్రతి రాతిరి అంతే ప్రేమగా
నాకు జోల పాడుతుంది

అన్నీ అలాగే ఉన్నాయ్
నేను మాత్రం మారిపోయాను

ఎలాగ జరిగిందీ ఇది?

2 comments:

surya prakash apkari said...

ఈ కవితకు కుదింపు అవసరం,మీరే ఎడిట్ చేసుకోవాలి!

శివ చెరువు said...

Sure.. Sir.. I will try to do it.. Thanks