Tuesday, April 16, 2013

ఎంత ప్రయత్నించినా.. మౌనాన్నీ ఆశ్రయించలేకున్నాయి..

ఏమని రాయను ..?
ఎంతని ఒదిగిపొమ్మనను పదాల్లో
నాలోని నిన్ను..

అలా.. ఇలా
అని
ఎలాగ చెప్పను..?

ఎన్నని ..
ఉపమానానికి దొరకని ఊహలు..
ఎక్కడ చూసినా కనపడే గురుతులు
నీ వెనుక తిరిగి నలిగిన దారులు..
నీతో కలిసి నడిచిన అడుగులు

నా మీద నేనే కోప్పడతాను
లో లోపల నవ్వుకుంటాను
అంత మందిలో నిన్ను వెతుక్కుంటాను
ఉన్నట్టుండి ఉలిక్కి పడతాను..

ఎందుకో తెలీదు కానీ..
మళ్ళీ మళ్ళీ నిన్ను తలుచు కుంటాను..
నువ్వూ నన్నే చూస్తున్నట్టనుకుంటాను..
వేల లక్షల అధ్బుతాలను చూసిన వాడిలా..
అలా ఆగిపోతుంటాను..

దాచలేని  ఆలోచనలు
చేతకాని మాటలు
వెలిగించిన నిశి రాతురులు
విదిలించిన సిరా చుక్కలు
ఇన్నిన్ని కాగితాలూ..
అన్నీ కలిసినా
ఎంత ప్రయత్నించినా..

నువ్వెవరని
నాకేమౌతావని..
చెప్పలేక పోతున్నాయి..
పూర్తిగా మౌనాన్నీ ఆశ్రయించలేకున్నాయి..

No comments: