Friday, February 17, 2012

ఎంత గొప్ప బంధం/భయం




చీకటికి వెలుగంటే భయం..
ఏదో చేస్తుందని..

వెలుగుకు చీకటంటే భయం..
ఏం జరుగుతుందో అని..

అయినా..
ఒక దానికి మరొకటి కావాలి..
"ఉన్నాను.." అని చెప్పుకోవడానికి..
అవకరాలు చూపించడానికి..
అవసరాలు తీర్చుకోవడానికి..

వెలుగు సేద తీర్చుకోవడానికి చీకటే రావాలి..
చీకటికి నిలబడడానికి వెలుగులో ఒక ఆధారం కావాలి..

పగలు పరపతి వెనుక
కావలసిన నటన
వీలైనన్ని ముసుగులు

రాతిరి పనులు కనుక
రాశులు పోసిన లాభం
చాలనన్ని కోణాలు

బయటకు అతిశయాలు పోతాయి కానీ..
అటు ఇటుగా పోయి
అవి కొత్త పుంతలు తొక్కవు..
సమాజం దాన్ని.. వింత పోకడలని ప్రచారం చేస్తుందని వాటికి ఎరుకే...!

అవకాశాలు ఏవో కళ్లెగరేస్తాయి కానీ...
కాసేపు ఇక్కడ అక్కడ
అద్దెకు దిగుతూ ఉంటాయి..
ఇచ్చి పుచ్చుకునే పంపకాలకు అవి అలవాటే..

లోపల లోపలే దాపెట్టేసి..
బయటకి మాత్రం భయాన్ని జయించినట్టు
భాయి భాయి అని చేతులు కలిపేసుకుంటాయి.
తప్పని సరి స్నేహాన్ని నటిస్తూ..
వెనుక వెనుక భుజాలు ఎగరేసుకుంటాయి..



*picture credit goes to original photographer and source. It will be removed in case of any objections.

No comments: