Tuesday, December 29, 2009

తెలుగు సినిమాల్లో వెరైటీ





  • హీరో ఎక్కువ సినిమాల్లో పరమ పోరంబోకెందుకనో? (దర్సకుడేమో ప్రేక్షకుల నాడి పట్టుకున్ననంటాడు కొంపదీసిఇదేనా )
  • పాటల్లో ఉన్నట్టుండి పాతికేసి మంది సైడు డాన్సర్లు వచ్చేస్తారు ఎలానో? (హీరో సరిగ్గా స్టెప్పులు వేయకుంటే కవర్ చేయడానికి కామోలు)
  • వందమందిని హీరో కొట్టేస్తాడు వెను వెంటనే కులాసాగా డ్యూయెట్ సాంగ్ కి సిద్దమైపోతాడు. ఎలాక్ట్రాల్ , గ్లూకోస్ గట్రా తాగుతాడా ఏంటి?
  • నిర్మాతలు చాలా మంచోళ్ళా? ఎక్కువగా, సరైన బట్టలు కూడా లేని కట్టుకోలేని నటీమణుల్ని ఇతర రాష్ట్రాల్లో వెతికిమరీ తెస్తారు.. అయినా హీరోల పరిస్థితి కూడా అంతే ఉంది కదా.. ఎవరిననాలబ్బా?
  • సినిమా సంగీతం అంటే ? వంద రోజులు గుర్తుండేదని అర్ధం
  • విలన్ అంటే సినిమా క్లైమక్ష్ వరకూ ఉండి దెబ్బలు తినేవాడా? కధకి ఎవరో ఒకరు బకరా కావాలిగా అనుకోవచ్చు...
  • ఈ మధ్య సినిమాల్లో కెమెరా సరిగ్గా నిలబడ్డం లేదు ఎందుకు సుమీ? నటులేమైనా చేస్తే తన పని తానూ చేస్తుంది. ఎప్పుడూ తనే కష్టపడాలంటే ఎలా..
  • ఉత్తమ కుటుంబ కధా చిత్రమంటే ..? ఓ కుటుంబం తీసిన సినిమా అనే కదా ?
  • చిన్న సినిమాలు అంటే ? చిన్న చూపు చూడ బడే సినిమాలు అనుకోవచ్చేమో..
  • హాస్య నటులంటే ? మిగతా పాత్రల చేత "ఛీ.." "తూ.." అనిపించుకునే వాళ్ళు, చెంప దెబ్బలు తినేవాళ్ళు..
  • A రేటింగ్ ఇచ్చిన చిత్రాలంటే పెద్దల చిత్రాలేనా? పిల్లలు ఎక్కువ గా చూసే చిత్రాలకు కూడా అదే రేటింగ్ ఇవ్వచ్చు.. ఎందుకంటే ఎవడు కొడితే దిమ్మ తిరిగి మైండు బ్లాకౌతుందో పిల్లలకి బాగా తెలుసు..
మొన్న ఓ స్నేహితుడంటున్నాడు నేనిక తెలుగు సినిమాలు చూడనని. ఇంకొకరు అంటున్నారు సినిమాలు వస్తున్నాయి కానీ కదిలించే సినిమాలు లేవని. చూడాలి అని అనిపించడం లేదు అని మరొకరు... ఇలా చాలా మంది సినిమా పై అసంతృప్తి వ్యక్త పరచిన వారే. గత కొన్నేళ్ళు గా ఫార్ములా పేరుతో పోటీ పడి మరీ తీస్తున్న తెలుగు సినిమా అదే మూస ధోరణి లో కొన సాగడం విచారకరం.

నోట్: సినిమా చూసి బాగుందో లేదో చెప్పడానికి సినిమా తీయడం రానక్కరలేదు

Monday, December 28, 2009

నేను మోసపోయానా?




నేను మోసపోయానా?
దయ చేసి అవునని చెప్పొద్దు

ఎందుకంటే నేను నమ్మాను..
మళ్ళీ మళ్ళీ నమ్మాను
గుర్తులేనన్ని సార్లు నమ్మి..
మాట పెగలక మిగిలిపోయాను

మిగిలిన కాస్త ఓపిక పోగేసి
సర్ది చెప్పుకున్నాను.

తెగిన ఆ రెక్కలు
ఇక రావని తెలుసు

నా భవిష్యత్తు
శాశ్వతంగా నిద్రపోయిందని తెలుసు

తిరిగి నేను నవ్వలేనని
జ్ఞాపకాల శిధిలాలో స్తభ్దంగా ఉండిపోతానని తెలుసు

ఇన్ని తెలిసినా నేను ఒక్క మాట అనలేదే..
నా అశ్రువులు ధారలైనా
ఊపిరాడక నే విల విల లాడుతున్నపుడైనా
ఏమనలేదు... ఎవ్వరినీ..

ఎవరి సంతోషంలో నన్ను భాగస్వామిని చేయమనలేదు
నా వైన క్షణాలను లాక్కోవదన్నాను
అంతే..అదే నే కోరుకున్నది

ఎందుకంటే నేను ఓటమిని ఒప్పుకోగలను కానీ
నన్ను ఓడించి నావాళ్ళు కూడా నాతోపాటే ఓడిపోయరంటే
వాళ్ళను వాళ్ళే మరింత అగాధాల్లోకి తీసుకెళ్ళి పోతుంటే
ఇక ఎవరు గెలిచినట్టు?

నేనూ నా వాళ్ళు కాక ఇంకెవరున్నారిక్కడ
ఎవరూ లేరని నాకూ తెలుసు

అందుకే
దయచేసి అవునని చెప్పొద్దు
ఓడిపోయానని గుర్తు చెయ్యొద్దు.

Saturday, December 26, 2009

దేవుడా ...ఎవరికీ చెప్పకు




దేవుడా ..?

జడపదార్ధాలకు
ఇంత జీవమిచ్చి
అంత విజ్ఞత జోడించి
మాంసపు ముద్దలను మనిషిగా చేసి కిందకొదిలేసావు

ప్రకృతి తో మమేకమయ్యి
ఆనంద నిలయాలను నిర్మిస్తాడనుకొని ఉంటావు

నీకు విశ్రాంతి నిచ్చి ...
విశ్వాన్ని ప్రేమ మయం చేయడం లో నీ పాత్ర తీసుకుంటాడని ఊహించి ఉంటావు

చివరి వరకు అతడు అతనిలానే జీవించి ..
నీ సాన్నిధ్యం చేరుతాడని ఆశించి ఉంటావు కదూ

ఎంత ముచ్చటపడి ఉంటావో మరి
నీ దిష్టి గాని తగల లేదు కదా ..?
లేక నీ లెక్క గాని తప్పు కాదు కదా ..?

ఏం చెప్పను..
పుర్రెకో బుద్దాయే!

నాది నాది అంటాడు ఒకడు
దోచుకోబడ్డానంటాడు ... ఆరళ్ళు పెడతాడు.. అల్లర్లు చేస్తాడు

తోచింది చేస్తాడు మరొకడు
స్వార్ధమెరుగనంటాడు..నా కోసమా? కాదు ... సమైక్య ప్రయోజనమంటాడు..

స్వీయ ఉద్దరణ మాని
దేశోద్ధారణ పేర ఏవేవో వింత పోకడలు పోతుంటాడు

ఇక్కడ ప్రతి వొకడూ మయసభ నిర్మాణధనుడే
ప్రతి వొకడూ దుర్యోధనుడే

పెద్ద ఎత్తున...
ఎవడి శ్మశాన వాటికలు వాడే తాయారు చేసుకుంటున్నాడు
ఎంత కాలమని ప్రపంచాన్ని అదే కిటికీ లోంచి చూస్తాడు?

అర్ధం కాని అవక తవకల ఈ స్థితికి
కారణం ఆదిలోని నీ సృష్టేనని ఎవరికీ చెప్పకు

చెప్పినా నాలాంటి ఛాందసులు నమ్మరులే గాని
బయటవరెవరైనా నవ్వి పోతారనేదే నా భయమంతా.. !

Tuesday, December 22, 2009

అవతార్ - సమీక్ష




జేమ్స్ కామోరోన్ నిర్మించి దర్సకత్వం వహించిన ఈ చిత్రం ఈ నెల 18 న విడుదల అయ్యింది. గొప్ప విషయం ఏంటంటే ఈ హోల్లీవుడ్ చిత్రం మన భారతీయ ఇతిహాసాలనుండి ప్రేరణ పొందిన కధ.

మానవుడు ప్రకృతిని తన చేత్తో తానే నాశనం చేస్తున్నాడు. ప్రకృతి ఉత్తమ గురువు, బందువు అని చెప్పడం చిత్ర ఉద్దేశం.
ప్రకృతి మనిషిని ఎంత జాగ్రతగా కాపాడుతుందో.. అలాగే మనిషి ఎంత అజాగ్రత్త గా వ్యవహరిస్తున్నాడో కొన్ని కొన్ని సన్నివేశాలు కళ్ళకు కట్టినట్టు చూపిస్తాయి. చిత్రం నిండా రంగులు, అద్భుతాలు , వింతలూ కళ్ళు తిప్పుకోకుండా చేస్తాయి..ఇంకా మాక్ అప్, ఆర్ట్ వర్క్, కెమెరా, నేపధ్య సంగీతం అన్నీ ఒకదాన్ని ఒకటి మించి పోయాయి. కధానాయకుని పాత్ర మలచిన తీరు ఆకట్టుకుంటుంది. అబ్బుర పరిచే పోరాట సన్నివేశాలు ఈ చిత్రం సొత్తు. నిర్మాతలు పెట్టిన (పోసిన) డబ్బులు ప్రతి frame లో కనపడతాయి. నన్ను మెప్పించిన విషయం ఏంటంటే ఇందులో , ప్రేమ, action, sentiment, excitement, moral values వంటి ఎన్నో విషయాలు దర్శకులు చెప్పగలిగారు. Body paintngs ఉండడం వల్ల ఈ సినిమా కి U/A రేటింగ్ ఇవ్వడం జరిగింది కాబోలు. 13 ఏళ్ళు నిండిన పిల్లలు నిరబ్యంతరం గా చూడొచ్చు.

ఈ మధ్య కాలంలో నేను చూసిన ఉత్తమ చిత్రం అవతార్. చూస్తే (అవకాశం ఉంటే )ఈ చిత్రం 3D లో చూడండి. మీకు వినోదం రెండింతలు కలుగుతుంది .

Friday, December 11, 2009

అమరావతి సినిమా సమీక్ష




వారం నించీ చూద్దామని తహ తహ లాడిన అమరావతి సినిమాని చివరికి ఈరోజు చూసాను..

సినిమాకి దర్శకులు రవిబాబు ప్రాణం పోసారు. సినిమా మొదటి అర్ధభాగం ఆసక్తికరంగా సాగుతుంది. ద్వితీయార్ధం అంతా ప్రధమార్ధం లో సన్నివేశాలు, చిక్కుముళ్ళ గురించి ఉంటుంది. చిత్రంలో నటీనటుల నటన పాత్రలకు తగ్గట్టు ఉంది. ఎక్కువగా కామెడీ విలన్ గా చూసిన రవిబాబు ఈ చిత్రంలో కధానాయకుడుగా కనపడతారు. కధకి ముఖ్యమయిన పాత్ర ప్రతినాయకుని పాత్ర అందులో "తారకరత్న" ఆకట్టుకుంటారు.
ఇద్దరిదీ ఇందులో కొత్త నటన కనపడుతుంది.తారక రత్న గొంతు కొన్ని సన్నివేసాలలో మరింత గంభీరంగ ఉంటే ఇంకా బాగుండేది. ఈ కధకి భూమిక, స్నేహలాంటి established artists అవసరం లేదు. వారి బదులు మరెవరయిన నటించినా కధ నడిచేదే. సినిమాలో మలుపులెక్కువే. అయితే మొదటి పది నిమిషాల్లోనే కధలో violence ఉంటుందని చెప్పేస్తారు. మరు పదినిమిషాల్లో suspense మొదలౌతుంది. ఇక అక్కడి నించీ కధ పరుగులు పెడుతుంది. కొన్ని కొన్ని సన్నివేశాలకు ఎక్కువ లెంత్ తీసుకున్నరేమో అనిపించింది. సినిమా క్లైమాక్ష్ సన్నివేశం వేగంగా సాగుతుంది. సాగతీయలేదు కనుక మరి ప్రేక్షకులకి కూడా పాత్రలతో పాటే ఉన్నటు భావన కలుగుతుంది. ఇక సినిమాలో బాగున్నవి.. బాగోలేనివి.. ఇలా వున్నాయి..
========================================
బాగున్నవి..

చిత్రీకరణకు ఉపయోగించిన రంగులు
నటీనటుల నటన
ముఖ్యంగా సత్యానంద్ అందిచిన కధనం
శేఖర్ చంద్ర - నేపధ్య సంగీతం (సినిమాలో పాటలు లేవు)
ఆసక్తి కలిగించే కధలో మలుపులు
విశ్రాంతి సన్నివేశం
భారీగా లేని సంభాషణలు
మాక్ - అప్
========================================

బాగోలేనిది..

రక్తం ఎక్కువ సన్నివేశాలలో వాడడం
స్రీలపై దాడులు చేయడం అదే ఎక్కువ సార్లు చూపించడం
పైశాచిక ప్రేమ (అతి ప్రేమ కన్నా అతి ప్రేమ)
క్రూరత్వం (మొదటి పది నిమిషాలలో )

========================================

సినిమా బాగానే ఉంది కాని, పైన చెప్పిన "బాగోలేనిది.." వల్ల సినిమా నాకు నచ్చలేదు.
దయ చేసి గర్భిణి స్త్రీలు, చిన్న పిల్లలు, గుండె జబ్బు ఉన్న వాళ్లు సినిమా చూడకండి

సినిమా కధ గురించి నేను ఏమీ చెప్పను. ఎందుకంటే ఉత్కంట కలిగించే చిత్రాల కధ ముందే చెప్పేసుకుంటే మజా ఉండదు. లేదు తెలుసుకుని తీరాలంటారా.. తరువాత కింద లింకు చూడండి

http://navatarangam.com/2009/12/amaravathi-telugu-film-review/

Wednesday, December 9, 2009

నేనూ వెళ్లి పోయాను..




నీవెళ్ళిపోతున్నావు
తెలుస్తోంది...

అంతరిక్షానికెక్కి అరవాలనుంది
కదలొద్దని చెప్పడానికి..

కానీ ఏం చెయ్యను?
ఆగి పొమ్మని చెప్పను..
చెప్పి నీ భవిష్యత్తుని ఇక్కడే ఆపెయ్యను..

నీవా?

నా ప్రేయసివి కావు
పది పది మార్లు ప్రేమించానని చెప్పడానికి

చుట్టరికానివి కావు
మళ్ళీ కలుద్దామని మాట సర్దడానికి..

నేనై నాతో తిరిగావు
నీకేం చెప్పను..

ఒదిలేసి పోతున్నావు..

నేనూ ఎమనలేక నిశ్శబ్దంగా ఓ మూల నించున్నాను
చూస్తూ ఉండిపోయాను

కానీ ఎంతసేపని
నన్ను నేను ఆపుకున్నాను..?
ఆ ఆఖరి క్షణాన కౌగలించుకుని..
పసిబిడ్డకు మల్లే కన్నీరు కార్చాను..

నీవూ ఏం అనలేదు
నే చెప్పాలనుకున్నది నీకర్ధమైదనుకుంటాను
అప్పుడు మనకి మాటల అవసరం రాలేదు..

ఎందుకో.. మరి కొంత ఆ సమయాన్ని నే పొడిగించలేదు
అలాగే .. మరలి వెనుకకు చూడలేదు

నీవెళ్ళి పోయాక మాత్రం..
ఓసారి ఆకాశం కేసి చూసాను
నీవు లేక ఇక పైకి ఎగరేలేనేమో అనిపించింది

చేసేది లేక కిందకు తల వంచి
అక్కడుండలేక.. నేనూ వెళ్లి పోయాను

Sunday, November 29, 2009

ప్రేమే నిజమైతే..!




ఇకపైన కలలు రావు
ఊహల అవసరం కూడా నాకు రాదు

ఏ గాయాలకు నన్ను నేను సిద్దం చేసుకోనక్కరలేదు
వాస్తవ అవాస్తవ అవస్థల చర్చ కూడా నాలో ఇక లేవనెత్తదు
మరింకేదో వెతుక్కోవడమూ.. జరగదు

దూది కన్నా తేలికగా తేలిపోతుంటాను
గాలిపటాన్నై మేఘాన్నంటుతాను
మనసుననుసరించేస్తాను
భూమి చివరిదాకా పరిగెడుతాను

ఆపై మాటలు దాచక
నాకన్నా నన్ను నేను గొప్పగా వ్యక్తీకరిస్తాను

ప్రతిక్షణం...
ఆశ్చర్యానికిలోనౌతాను
జీవించేస్తాను
అభేదమైన ఓ స్థితినంటుతాను

భూత.. భవిష్యత్.. వర్తమాన.. కాలాల్లోనూ నేనే వుంటాను


:- ఈ కవిత రాయడానికి ప్రోత్సాహమిచ్చిన "పద్మార్పిత" గారికి ప్రత్యేకంగా ధన్యవాదాలు తెలియజేసుకుంటున్నాను.

Wednesday, November 25, 2009

బస్సాయణం




ఎదురు చూసినంత సేపూ బస్సొస్తే చాలు
వచ్చిన తరువాత నుంచునేంత, నువ్వుగింజంత చోటుంటే చాలు

మరి ఆ మాత్రం చోటుంటే మనసాగుతుందా?
ఎక్కడో ఓ ఇనుప కడ్డీకి ఆనుకుందామనిపిస్తుంది
అక్కడినించీ పక్కన కూర్చున్నవాళ్ళపైన కన్ను పడుతుంది
ఇక దిష్టి, దృష్టి అంతా వారిపైనే

ఓపక్కన ఇరుకు వల్ల అసహనం, చెమట, చిరాకు వగైరా వస్తుంటే...
ఆ డ్రైవరుబాబు బ్రేకు పై కసిగా ఒక్క తొక్కు తొక్కుతాడు

ఇక మనకన్నా పెద్ద సైజులో వున్నవాడో లేక మందేసినవాడో మీదపడతాడు
అప్పుడు కదా నరకం తలుపులు తన్ని.. లోపల అడుగు పెట్టినట్టుంటుంది!

ప్రతి మలుపులో కధ మలుపులు తిరిగి మంట నషాళానికి ఎక్కుతుంది
ఓపికకు పరీక్ష పెడుతుంది
దిగి బయటకు వెళ్ళిపోదామా .. అనిపిస్తుంది
ఇంతలో ఒక సీటు చేతులు చాచి పిలుస్తుంది..
ఒకటో తారీఖుకి వారం ముందే జీతం వచ్చిన ఆనందం కలుగుతుంది ;)

యురేకా...!

అదృష్టాన్ని తలుచుకొని కూర్చోగానే
ఒళ్లో నాలుగైదు పుస్తకాల సంచీలు పడతాయి..
ఎవడో వచ్చి నాభుజం మీద ఆనుకుని తను కొత్తగా కొనుక్కున కర్లాన్ పరుపులా ఫీల్ అవుతాడు
అప్పుడు నేను అక్కడ కూర్చున్నందుకు పశ్చాత్తాప పడతాను

ఇంతలో బస్సుటైరు పంచరుపడి మంచి ట్రాఫిక్ గల నడిరోడ్డుపై ఆగిపోతుంది

ఇక అంతటితో నరకంలో అన్ని విభాగాలని దర్శించిన వాడనై

నడిచి నా గమ్యస్థానానికి మరింత ఆలస్యంగా చేరతాను

Friday, November 20, 2009

ఒక్క నిమిషం




ఒక్కో నిమిషంలో
ఎంత అందం !
ఎంత స్వేచ్చ !

అలాంటప్పుడు,
నేనేనా..? అనిపిస్తుంది
ఆనందాన్ని కనుక్కున్న అనుభూతినిస్తుంది

వెంటనే..
ఆకాశాన్ని కిందకి దించి..
రాత్రిని మేలుకొలిపేస్తాను
భూమ్యాకాశాలు చుట్టేస్తాను
ఉన్నట్టుండి నిశ్చలమైపోతాను

మళ్ళీ..
ఎంతో వేగమైన ఆలోచనలలో దొరలిపోతాను

సరిగ్గా ఈ "ఒక్క నిమిషం"
ఎందుకో తెలీదు కాని
తన స్థిరత్వం కోల్పోతుంది
ప్రవర్తన మార్చేసుకుంటూ ఉంటుంది

కాసేపు జ్ఞాపకమౌతుంది
మరి కాసేపు రేపటి ఆశకు స్వాగతచిహ్నమౌతుంది

Wednesday, November 18, 2009

ప్రేమే కల్పనైతే..?


క్రిఏటివ్ కుర్రోడు మాధవ్ గారు రాసిన "ప్రేమే కల్పనైతే.." అనే పోస్ట్ ని చూసి రాసిన కవిత ఇది...

http://creativekurrodu.blogspot.com/2009/11/blog-post_13.html



ప్రేమే కల్పనైతే..?

సొంతమనేది లేక,
సొంతం కాలేక

ఎవరికెవరో అయి..
ఓ నామ మాత్రపు బ్రతుకు వెళ్లదీస్తుంది దేహం

మసిబట్టి, మసకబారి పోతుంది
మనల్ని మనం చూసుకునే అద్దం..

భావ రాహిత్యంలో
స్పందన కరువై
శూన్యంలో విలీనమౌతుంది జీవితం..

Sunday, November 15, 2009

కుర్రాడు - సమీక్ష

నిన్న శనివారం రాత్రి సెకండ్ షో కుర్రాడు సినిమా హాలుకు వెళ్ళా. చూస్తే జనాలు పెద్దగా లేరు. అదేంటి రెండు రోజులేగా అయ్యింది సినిమా విడుదల అయ్యి ఏంటబ్బా ఇంత కాళీగా వుంది అనుకున్నా. ఇదే ముక్క టికెట్ కౌంటర్లో అడిగా.. ఏమండీ సినిమా ఎలావుంది? బాగుందా? అతను నెత్తి కొట్టుకుని, టికెట్ చేతిలో పెట్టి పక్కకు జరగమన్నాడు. అక్కడికే ముప్పావు వంతు అర్ధం అయ్యింది ఈ సినిమా తంతు ఎలా వుందా అని..సరే తినబోతూ రుచులెన్దుకని మారు మాట్లాడకుండా వెళ్లి నా సీట్ లో కూర్చున్నా.

సినిమా మొదలయింది ...

ఓ పోకిరి "కుర్రాడు" ,వీడికి బైక్ పిచ్చి ..ఓ ముగ్గురు స్నేహితులు.. ప్రేమిస్తున్నానని చెప్పుకోడానికి ఓ అమ్మాయి.. ఓ రోజు బాగా తిరిగి.. తాగి.. ఊగి..(మధ్యలో కుర్రాళ్ళోయ్ కుర్రాళ్ళోయ్ అనే పాట) ఇంటికొస్తాడు హీరో.. సహజంగా తండ్రి పాత్ర ఎంచేస్తుందో (తనికెళ్ళ భరణి ) ఈ సినిమా లో అదే చేస్తుంది..నేను బాగు పడాలంటే నువ్వు డబ్బులివ్వాలి అన్న ఆ కొడుక్కి, కూతురి పెళ్లి కోసం దాచిన కట్నం ఇచ్చేస్తాడు,కళ్ళల్లో నీళ్లు పెట్టుకుంటాడు. ఆ డబ్బు పెట్టి కుర్రాడు ఓ బండి (APACHE) కొంటాడు.

అక్కడినించి కదా.. కధ మలుపు తిరుగుతుంది. కొన్న ఆ కొత్త బండి ఆ కుర్రాడికి, అమ్మాయిని, ఉద్యోగాన్ని, భాద్యతలని అలాగే కష్టాల్ని ఎలా తెచ్చిపెడుతుందో వెండి తెరపై మీరే చూసి ఆనందించాలి.

వరుణ్ సందేశ్ కొత్తగా ఈ సినిమాలో రెండు ఫైట్లు ఎక్కువ చేసాడు అంతే..ఇంకేమీ కొత్త దనం చూపించలేదు. ఇంకా అతను తెలుగు పలకడం మీద మరింత శ్రద్ద పెడితే బాగుండేది. హీరోయిన్ గురించి చెప్పుకోడానికి ఏమీ లేదు. "Emantaave" అనే పాట బాగుంది. విలన్ గా రవి శంకర్ బాగున్నారు. అలానే బుల్లెట్ పాత్రధారి నటన బాగుంది. సినిమా లో కలర్ కామ్బినాషన్ మరింత బాగుంటే బాగుండేది. సినిమా లో ఒక కామన్ బాక్గ్రౌండ్ మ్యూజిక్ చాలా బాగుంది. తనికెళ్ళ భరణి నటన అద్భుతం!

సీన్స్ పరంగా పర్లేదు కాని... ఎడిటింగ్ లోనో ఏమో 'లేక' తీయడంలోనో అమరిక సరిగ్గా కుదరక కొంచెం అసహనం గా అనిపిస్తుంది. మొత్తం గా సినిమాలోకీ వెళ్ళలేము అలానే బయటకీ వెళ్ళలేము (అయ్యేంత వరకు).

చివరాకరికి ఏంటంటే సినిమా పెద్ద గొప్పగా లేదు. "బెటర్ వెయిట్ ఫర్ DVD"

Friday, October 23, 2009

నీకేం..!




నీకేం..!
ఓ నవ్వు నవ్వి ఊరుకున్నావు
కాస్త కన్నెగరేసి జారుకున్నావు
నన్నేమో ఊహల కొదిలేసావు

అదిగో అప్పటినించీ
మొదలయింది..

చూసి చూడకుండా ఓ చూపు చూస్తావే
దాని కోసం ..

కనపడనీయ కూడదని తడబాటును దాస్తావే
దాని కోసం..

నీ వెనుకే నే వున్నానని ఆగి ఆగి నడుస్తావే
దాని కోసం..

నన్నాపుకోలేక నిన్ననుసరించడం

ఏమనవు
అననీవు..

చేరువ కానిచ్చి
చొరవ తీసుకోనీవు..

ప్రశ్నల్లే కనబడతావు
జాబూ నీవేననిపిస్తావు
అర్ధం కావు...

Sunday, October 4, 2009

ఏది కాపాడగలిగింది ?




జీవిత కాలం కూడబెట్టిన జీతపు సొమ్ము
సంఘానికి భయపడి, నటించిన మంచితనం
కోర్కెలణచుకొని, చేశాననుకున్న త్యాగం
మందులేసుకుని, కాపాడుకుంటున్న ప్రాణం
పూజలు చేసి, పోగేసుకున్న పుణ్యం

ఏది ఆపగలిగింది
బలవంతంగా ఆగిపోతున్న హృదయపు లయని..

ఏది కాపాడగలిగింది
ఊపిరాడక, చేత కాక చల్లబడిపోయిన శరీరాన్ని..

Sunday, September 27, 2009

మా శ్రీశైల దర్శనం 1







బ్లాగ్
మిత్రులందరికి విజయ దశమి శుభాకాంక్షలు.

ఉదయం 8.30 కి శ్రీశైలం చేరాము. ప్రశాంత వాతావరణం. అప్పుడే వర్షం పడి ఆగిపోయింది. చల్లటి గాలి, పచ్చని చెట్ల వాసన, మబ్బులు వీడి బయట కొస్తున్న భానుడు.. గొప్ప అనుభూతి తో మొదలయింది రోజు..

ఆ రోజు శంకర మఠం లో మాకు బస ఏర్పాటయింది. మఠం నుండి స్వామి వారి ఆలయ ప్రవేశ గోపురం కనపడుతూనే వుంది.. హడావిడి గా పనులు ముగించుకొని 10.౩౦ కల్లా ఆలయ దర్శనానికి బయలుదేరాము.

నాకు మొదటి నుంచి ఉచిత దర్శనమంటేనే ఎక్కువ ఇష్టం. ఎందుకంటే, మరి కొంత సేపు స్వామి వారి ఆలయ ప్రాంగణం లో సమయం గడిపే అవకాశం వుంటుంది కనుక. చూస్తే ఉచిత దర్శనానికి చాల పెద్ద క్యూ ఉంది.
చాలా ఆలస్యం అయ్యేట్టుంది. దర్శనం జరగదేమో అన్న అనుమానం కూడా లేక పోలేదు. ఏం చెయ్యాలి
ఇంక టిక్కెట్టు తీసుకోక తప్పింది కాదు.

మేము మొత్తం నలుగురం. నేను, మా అమ్మగారు ఇంక ఇద్దరు బావలు. ఘాటి రోడ్డు ప్రయాణం లో కాస్త అలసి వున్న మేము ఇప్పటికిదే మంచిదనుకున్నాం. క్యూ కొంత ముందుకు కదిలింది. సరిగ్గా మేము ధ్వజ స్థంబం వద్దకు చేర గానే క్యూ ఆగి పోయింది. సమయం గడిచి పోతోంది. నీరసం ఆవరిస్తోంది. పక్కన ఆవలింతలు, ఏవేవో కబుర్లు, నాకు ఎవ్వరిలో భగవథ్ద్యానమ్ తాలూకు చాయలు కనపడలేదు. లైన్ లో ఆలయం లో కాసేపు వుండాలన్న నా కోరిక మాత్రం తీరింది. ఎంత సేపటికీ ముందుకు వెళ్ళే పరిస్థితి లేదు. కనీసం లోపల స్వామి వారికి ఏం సేవ జరుగుతోందో తెలిస్తే అదో ఆనందం.. చివరికి ఆ బాగ్యం కూడా లేదు. దసరాల సంధర్బంగా ఏర్పాటు చేసిన ఒక బృందం శివుని పాటలు భజన చేస్తోంది. అన్నీ చక్కటి పాటలే.. గొప్ప అర్ధవంతమైన పాటలే. కాని ఈ స్పీకర్ సిస్టం పాతది అనుకుంటా .. ఎకో ఎక్కువయింది.. కొంత చిరాకు తెప్పించిందనే చెప్పాలి. అసలే ఎదురు చూపులవల్ల, అలసట వల్ల నీరసించి చాలా మంది లైన్ లోనే ఎక్కడి కక్కడ కూర్చుంది పోయారు.. కొంత మంది నిద్ర పోయారు. అందులో నేనూ వున్నాను. మేము వున్నది శివుని ఎదురు గా ఉన్న నందీశ్వరుని పక్కనే. నందీశ్వరుడు చాలా బాగున్నారు. చుట్టూ బోలెడు చిన్న చిన్న ఉప ఆలయాలు కాన పడుతూనే వున్నై. కాని బయటకు వచ్చేదెల.. ఆ శివయ్య అనుమతి దొరికినప్పుడే కదా..ఇంక ఓం నమః శివాయ అనుకోవడం మొదలు పెట్టాను. కొద్ది సేపటికే లైన్ ముందుకు కదిలింది.. స్వామి వారి దర్శనం జరిగింది. అక్కడి ఆధ్యాత్మిక తరంగాలు మనస్సులో మలినాలను ప్రక్షాళన చేస్తాయి. అనంతరం అంతసేపు పడ్డ ఇబ్బందులేమైనా ఉంటే మొత్తం మరిచి పోతాం. అక్కడి భగవత్ దర్శనం లో ఒక చల్లని స్పర్శ వుంది. అది సర్వ రోగ నివారిణి అనిపిస్తుంది.

అక్కడి నుండి అమ్మ వారి ఆలయానికి బయలు దేరాం. అమ్మ ఎంత గొప్పగా వుందంటే, ప్రసాంతత, ప్రేమ, కరుణ, మూర్తీబవించిన రూపు ఆమెది. మాటలు చాలవు. ఎదురు గా శ్రీ చక్ర పూజలు జరుగుతున్నాయి. మండపం నిండుగా భక్త జనం. వేద మంత్రాలు చెవిన పడుతున్నాయి, చేతిలో తీర్థం తీసుకుని పాదుకల ఆశీర్వాదం అందుకుని బయటకు నడిచాము. తరువాత ఉప ఆలయాల దర్శనం చేసుకుని మఠం కి తిరిగి బయలు దేరాము.

బయటకు రాగానే లోపల ఆకలి మొదలయింది. మఠంలో అప్పుడే ఏకాదశ రుద్రాభిషేకం పూర్తి చేసుకుని భోజనాలకు ఉపక్రమిస్తున్నారు అందరూ. మేము కూడా వెళ్లి భోజనాలలో కూర్చున్నాం. అక్కడ మగ వారి వస్త్ర ధారణ పంచె వుత్తరీయం. మేము మాత్రం ప్యాంటు చొక్కాల్లో ఉన్నాం. వాళ్ల పద్దతి గమనించి మా అల్లరి కొంత తగ్గించి నడుచుకున్నాం. భోజనాల రుచి కమ్మగా వుంది. భోజనాల కార్యక్రమం ముగించిన తరువాత ఓ పెద్దాయన మెల్లగా చెప్పారు ఇక్కడ బోజనలకి పంచె కట్టుకునే రావాలని.. అప్పుడర్ధం అయ్యింది. ఎక్కడి పద్దతులు అక్కడ పాటించడం ముఖ్యమని.. ముందుగా తెలుసుకోవడం అవసరమని...

ఇంక అక్కడి నుండి శ్రీశైలం చుట్టు పక్కల విశేషమైన ప్రదేశాలు చూడ్డానికి బయలు దేరాము...
ముందుగా ఇష్ట కామేశ్వరి అమ్మవారి దేవాలయానికి బయలుదేరాము. అది శ్రీశైలం నుండి 23 కిలో మీటర్ల దూరంలో అడవిలో వుంది... ఇది గొప్ప సాహస వంతమయిన ప్రయాణం.. దీని వివరణకు మరో ప్రకరణం రాయాల్సిందే.. ఛాయా చిత్రాల సహితం గా మళ్ళీ కలుస్తాను ఉంటాను.. ప్రస్తుతానికి మాత్రం గూగుల్ లో సేకరించిన కొన్ని శ్రీశైల చిత్రాలు పైన చూడండి... ధన్యవాదములు

Monday, September 21, 2009

రంజాన్


.

బ్లాగ్ మిత్రులందరికి ... రంజాన్ పండుగ శుభాకాంక్షలు..

Sunday, September 6, 2009

నన్ను పోల్చుకొందుకు!




మునుపటి ఆ కధలలో
అతికించుకున్న నవ్వులతో
తొడుక్కున్న వ్యక్తిత్వంతో
నా అస్థిత్వాన్ని కోల్పోయానని ..

అంతరంగం వెక్కిరిస్తోంది..

అందుకే
నేను లేని నన్ను చూసుకోవడం మానేసి
.
.
.
వదిలేస్తున్నా
ఇక్కడే..
అన్నీ!

నన్ను పోల్చుకొందుకు!


.

Saturday, August 29, 2009

బంధాలు...




ఆశాధారితలు
స్వేచ్చ ప్రదాతలు..

బలహీనతలు
బతుకు మూలాలు..

విభేదాల అభేదాలు
గీసుకున్న గీతలు..

మాసిపోనీ..!
ఇవి రంగుల చిత్రాలు...!



.

Monday, August 17, 2009

నాకు నేను చెప్పుకునేవి...

.




అరిగిపోయిన నీ చెప్పులే కాదు..సుమా..
ఎండకు నేలకంటిన పాదాలున్నాయి..ఇక్కడ..




==================================


రుచులెంచుకునే సౌకర్యం నీది..
ఓ ముద్ద నోట్లోకెళ్ళడానికి .. చేతులు చాచే జీవితాలున్నాయి చూసావా..?




====================================



నీ వారి లో చిన్న చిన్న లోపాలెంచి..కలత చెందకు...
ఎవరూ లేని వారిని అడిగి చూడు..తెలుస్తుంది. తరువాత మిగిలే ఆ ఒంటరితనం ఏంటో..



========================================



నిరాశలో ఉండిపోతే..నీకేమి మిగులుతుందని..
నీవెవరి బాటలో నడుస్తున్నావో వారినోసారి అడిగి చూడు..ఏమి సమాధానం దొరుకుతుందో..



====================================



చీకటి లో ఉండిపోకు..వెలుగుకే అలవాటు పడకు..
రెండిటి కలయికే..ఓ రోజుని సంపూర్ణం చేస్తుందిగా మరి...




Saturday, August 8, 2009

చెరిగి పోతున్నై..




కిరసనాయిలు బుడ్డీలెలిగించుకుని
కాసింత చద్ది కూడు కుండలో ఎట్టుకుని
సముద్రానికి ఇంతే దూరంలో కూకుని
గుంటలడిన గోళీ కళ్ళతో..
అటు ఏపే సూత్తన్నా ..

ఏడదాకొచ్చిండో కొడుకు
ఇంతన్నం దిని తొంగునేటోడు ఈ ఏలకు

గుడిసె ఇడిచేప్పుడ్డన్నాడు ..
"ఈ ఏల బంగారం తెత్తా" నని
నవ్వి ఊరుకున్నా..గాని ఏమనలేదు ..

రానీ.. ఇప్పుడు సెపుతా ..

ఇదిగో ఈ సినిగిన గుడ్డలు ఏసుకుని.ఉంటా..
అర కొర ఆకలి నింపుకుని..
ఓ మూల పడుంటా గాని .. మరింకేటీ మనకొద్దని..

సంద్రంలో సగానికి మునిగిన పడవ లాటి బతుకులు మనయి..
బ్రతకడమే గావాలి గాని..
రేపటిమీద అత్యాశ వద్దని..

యేడి..
గంటలయిపోతున్నా..ఇంకా రాడే..

చీకట్లో గుచ్చి గుచ్చి ఎతికే కళ్లు..
ఆడిగురించింకా ఏమనట్లేదే..

అరె ..
కాసింత బుడ్డి యెలుతురూ పోయింది..
మొత్తం చీకటైంది..

చూసే లోపలే..
తీరం
అంచున ఇసుక మీద
పడీ
పడని కాలి అచ్చులు ..
అలలు తమ చివర పోగుచేసుకున్న నురగ తాకి..
చెరిగి పోతున్నై..



.

Tuesday, August 4, 2009

ఆకాశ వీధిలో..




మైత్రీ వనంలో వూయలూగాలని..

కలిసి..
ఆగని
గీతానికి రచన చేయాలని...

ఒకటిగా ఆదమరిచి పోవాలని..

ఇంకా..
ఇంకా...

ఎన్నెన్నో ఆలోచనలు..ఇటుకలు చేసి..
కట్టుకున్న భవంతిలో ఇలాగే వేచివున్నాను..

ఇన్నాళ్ళూ నేనేనా..
ఇంత కాలం నాదేనా.. ఆత్రుత..నీ కోసం...

అనుకుంటున్నా ...!

అప్పుడే.. ఎక్కడినుండో గాలి అలలు...
ఈ కబుర్లు తీసుకొచ్చాయి...

నీలి గగనాన ..
ఆ తారల మధ్యన..

వెలుగు తీగల.. వెనుకకు చూస్తూ
నా రాకను ఆశిస్తూ..

ఆకాశ వీధిలో..
తారాడే నీ ఊహలు ..

నాకన్నా ఎక్కువగా
మన కలయికకు ఒక వేదికను వెతుకుతోందని....

Thursday, July 30, 2009

నాకు నేనూ లేను..!





ఎవ్వరికీ
తెలియని కథ ..
"నా"..లో.. "నీ".. కధ..
మొదలయిన ఆ రోజు.. నాకింకా గుర్తు..

అక్షరాలు
అందక..
ఖాళీగా వదిలేసిన .. నా డైరీలో ..ఆ మొదటి పేజీ..
నిదుర పట్టక చందమామను వెక్కిరించిన రీతి..
ఇంకెపుడో ఆ రేపటి ఉదయమని..
దూరంగా దిక్కును చూస్తూ గడిపేసిన ఆ రాతిరి..

అలా..
అలా ..
ఎన్ని రోజులో నాతో నడిచి వచ్చేశాయి..!

ఇదే నీతో చెబుదామన్నపుడల్లా.. నాలో ఆరాటం ..
ఇంకా ఆలోచిస్తూ వుండిపోయాను..
మరింకేదో అంటూ వచ్చేసాను..

ఆలస్యం చేశానేమో..
ఉన్నట్టుండి ఓ రోజు.. వచ్చేసిందో వార్త ..
నీకు నాకు మధ్య ..ఓ దూరం శాస్వతమౌతోందని ..
నా రాతలు..నన్నే చెరిపేసుకోమని...
చెప్పింది...
చెప్పి వెళ్లి పోయింది..

కన్నీటిని రెప్పలు దాచుకోలేవని..అద్దాలు అడ్డు పెట్టుకున్నాను......
చెంపకు పై పై నవ్వులు అద్దాను..
నీ తాలూకు గురుతులు నీకే వదిలేసాను..
ఆరాట పడక ఆగిపోయాను..

ఇప్పుడు ఆ కాగితాలూ లేవు .. నీవూ లేవు..
రాసిన నేను మాత్రం.. మిగిలిపోయాను..
అయినా నాకు నేనూ లేను..!

Monday, July 20, 2009

ఓ పెద్ద మనిషీ..




నాది పరాజయం..అంటున్నాడెవడో పెద్ద మనిషి..
అదే పనిగా నన్నే చూస్తున్నాడు..
సంవత్సరాల తరబడి వెంటాడుతున్నాడు..
ఓటమి పాలైనపుడల్లా ...ఓ వెక్కిరింపు నవ్వు నవ్వాడు..

బదులుగా ...

నేను కూడా నవ్వేవాడిని..
నా గెలుపు ఓటములకు నీవెలా నిర్నేతవైనావని..
నను నిర్దేశించే నీ కొలబద్దలేమని..

మార్పు కావాలనే వాదనే కానీ...

ఆలోచించాడా ఎపుడైనా..
ఏంచేస్తున్నాడని..?

ఆదరించాడా ఎపుడైనా..
ఆశతో.. తలుపు తట్టిన వారిని..?

మార్పు కోరుకునే అతడు...
మార్పుకు సిద్దపడి లేడు...

మరి ..
ఈ నవ సమాజ నిర్మాణంలో నా పాత్రనెలా ప్రశ్నించగలడు....?




.

Thursday, July 16, 2009

ఇక ఆ యశోదకు ఏమివ్వగలను..




రంగుల జల్లునో..
దోచుకెళ్లిన హరివిల్లునో..

అతిధినా ఆ ఇంటికి నేను ..కానేమో..?
చిరకాలం ఉండిపోలేదు..
ఈ కృష్ణ పాదాల గురుతులు చెరిగిపోలేదు..

బతుకున ..వేడుకల రాయబారినా నేను..కానేమో?
సంబరాలు మోసుకొచ్చాను..
వరాల రుచి చూపి వెనుదిరిగాను..

ఇది ఆర్తి కాదని చెప్పలేను.. ఓదార్పు వెతుక్కోలేను..
అవ్యక్త భావనలో.. అటు ఇటు గా నేను..
గొంతుక గుమ్మం దాటిపోలేను...

ఇక ఆ యశోదకు ఏమివ్వగలను..


Sunday, July 12, 2009

సొంత కధ..

కధని.. మూడు పాత్రల దృష్ట్యా చదవండి.. మీకు కధలో మూడు వివిధమైన . ముగింపులు.. తెలుస్తాయి..




అనగనగ ఒక పిల్లి, కుక్క , పంది... మంచి స్నేహితులు గా ఉండేవి...పిల్లికి దేనిమీదా స్థిరత్వం లేదు.. కుక్క ఏమి చెప్పినా నమ్మేస్తుంది..(గుడ్డి నమ్మకమన్న మాట..) ఇక పందికి పద్దతులు.. పాడు..ఏమి లేవు..ఎక్కడ ఎలా ప్రవర్తించాలో తెలీదు... ఎప్పుడూ ఎవ్వరితోనో తిట్లు తింటూ వుంటుంది. అది చేసే..చెత్త పనుల వల్ల..

ఓ రోజు పిల్లికి ఒక ఆలోచన వచ్చింది.. ఎన్నాళ్ళిలా ...వీటితోనే తిరుగుతాం..ప్రపంచం చాల పెద్దది కదా..! నాకు వీళ్ళే మాత్రం.. విలువ ఇస్తున్నారు.... ఎక్కడికైనా వెళ్లి పోవాలి..ఏదో చేసెయ్యాలి..నేనే గొప్ప అనిపించుకోవాలి..

ఇంక పిల్లి అనుకున్నదే తడవు గా.. ఎక్కడికో వెళ్లి పోయింది..

కుక్క , పంది.. పిల్లి కోసం ఎక్కడెక్కడో వెతికాయి.. చివరికి కనిపించలేదని..చాలా భాద పడ్డాయి..

పిల్లి తిరిగి వస్తుందని..ఎక్కడో బాగానే వుందని కుక్క..నమ్మింది..
తనవల్ల పొరపాటు ఏదైనా జరిగిందేమో అని..పంది..ఇక పైన పద్దతి గా వుండడం మొదలు పెట్టింది..

కొన్ని నెలలు గడిచాయి..
.
.
.
.
.


పిల్లి చాలా చోట్ల తిరిగింది..కాని ఎక్కడా ..ఎవ్వరూ.. తనని గొప్ప అని వొప్పుకోలేదు సరికదా .. కనీసం సరైన ఆదరణ కూడా దొరకలేదు..

చివరికి తిరిగి..తన వాళ్ళ దగ్గరకి వచ్చేసింది..

కుక్క..పంది చాలా ఆనందపడ్డాయి ..కుశల ప్రశ్నల్లో..ఇన్నాళ్ళూ ఎక్కడున్నావు మిత్రమా ? అని అడిగేటప్పటికి..స్నేహితుల ముందు నిజాలు మాట్లాడడానికి..జంకింది.. తడుముకుంటూ..తప్పస్సు చేసుకోవడానికి వెళ్లానని..ఏవో శక్తులు వచ్చాయని..ఇప్పడు ఎలాంటి..జబ్బునైనా ... నయం చేయగలనని.ప్రగల్భాలు పలికింది..

ఇక అబద్దాలతో..కొంత కాలం గడిచింది..

పిల్లి వూళ్ళో లేని సమయంలో ..ఒక రోజు..కుక్కకి జబ్బు చేసింది..
పిల్లి కోసం ఎదురు చూసి చూసి..జబ్బు పెరగసాగింది..పంది చాలా సార్లు చెప్పి అయినా వాటిని పెడ చెవిన పెట్టింది కుక్క .ఇంకా ఏదో నమ్మకం..తన స్నేహితుడు వచ్చి కాపాడతాడని..

ఆఖరికి కుక్క చివరి క్షణాల్లో..పిల్లి తిరిగి వచ్చింది..

పిల్లికి నిజం వొప్పుకోక తప్పింది కాదు..అయినా చేసేది లేదు.. కుక్క చనిపోయాక .. పిల్లి రెండు కన్నీటి చుక్కలు విడవడం తప్ప..

కాల క్రమేణా .. పిల్లి ..పంది కూడా విడిపోయాయి....


.

Sunday, July 5, 2009

నీకు మాత్రం తెలియనిదా..?





స్నేహితులమా
?
రక్త సంభందమా?
దూరపు చుట్టరికమా?
మౌతామని ఒకరికి ఒకరం ...
మనలో ఎందుకీ మాటరాని తనం..

పైకే నా డాంబికం గానీ..
నాకే తెలియదు నేనెన్ని సార్లు సర్ది చెప్పుకున్నానో....

చూస్తుండగానే..ఆ సమయం వచ్చేసింది..
నా గడియారం నన్ను మరింత ముందుకు తోసింది..

చేతిలో చేయి వేసి ... నువ్వు వీడ్కోలు చెప్పేటప్పుడు..
నన్ను నీ గుండెకి హత్తుకున్నప్పుడు...

ఉండిపోదామనే ఉంది..
అని అరిచి చెప్పాలనుకున్నప్పుడు..

మూగ భాషనే ఆశ్రయించానేమోగాని గాని ..
మరేమీ..మాట్లాడలేదు..

ఎడబాటు తప్పదని తెలిసీ ...
మళ్లీ , .మళ్లీ...
ఎందుకు కలుస్తావని నన్నడిగిన ప్రశ్నకు...

ఏం చెప్పలేక పోయానేమో కాని...

కలిసిన ఆ కాసిన్ని క్షణాలు..ఈ ఎడబాటులో నాకు ఊపిరి పోస్తుందని...
నీకు మాత్రం తెలియనిదా..?


.

Saturday, June 27, 2009

ఆ వాన వెలిసింది...




చాలా కాలం తరువాత విచ్చేసిన అతిధిలా ..
మేఘాల గుంపు..మాఊరి కొచ్చింది..

నిట్టూర్పుల సెగ నుండి... విముక్తి దొరికేలా..
సన్నని.. చల్లని..గాలి..మొదలైంది..

వాలిపోయిన చెట్ల .. ఎండిన ఆకులు..
రెప రెపలాడుతూ .. రాలిపోతున్నై..

అదిగో.. చినుకులు మొదలైనాయి..
నీటి చుక్కలు కిందకి జారి పడుతున్నాయి..

పరవసించిందో ఏమో నేల...
మెండుగా మట్టి వాసనేస్తోంది..

క్షణంలో ...జోరు పెరిగింది..

అందరూ ఏ దొరికిన గూటికిందకో చేరిపోతున్నారు..

నేను మాత్రం...
చేతులు చాచి..వీధిలో ..నుంచున్నాను..
నన్ను నేను... వానకిచ్చేసాను ..

ఆకలేసిన పిల్లాడికి..
అమ్మ చేతి ముద్ద దొరికినట్టు...
ఎగిరి గంతేస్తున్నాను..

ఎంత సేపు గడిచిందో.. గురుతు లేదు కాని..

తరువాత..

ఆ వాన వెలిసింది...
నన్ను..తడి..చేసి వెళ్ళిపోయింది..


.

Monday, June 22, 2009

శ్రీ యోగానంద జ్వాలా లక్ష్మి నరసింహ స్వామి వారి కళ్యాణం మే 10 2009

శ్రీ యోగానంద జ్వాలా లక్ష్మి నరసింహ స్వామి వారి దేవాలయం.
చప్టా దిగువ, భద్రాచలం.

స్వామి వారి కళ్యాణ దర్శనం...

























కళ్యాణం అనంతరం భక్తులకు అన్నదాన కార్యక్రమం .....







for more information, please visit http://srinrusimham.bravehost.com/





.